အချိန်ရမှ /
နောင် ဖြစ်လာတော့မယ့် နိုင်ငံတော်သစ်ကြီးရဲ့
လူ့ အဖွဲ့အစည်း အကျိုး အတွက်
တစ်ခုခု လုပ်ပေးချင်စိတ် ရှိမှပဲ ဖတ်ပါ ။

စာ ရှည်ပါလိမ့်မယ် ။
တစ်ချို့ဟာလေးတွေက
ကိုယ်ရေးကိုယ်တာ ဆန်နိုင်တော့
ကျွန်တော့ကို ခင်မင်ရင်းစွဲ ( ဒါမှမဟုတ် )
စိတ်ဝင်စားမှု တစ်ခုခုရှိမှပဲ
ဖတ်တာ ကောင်းပါမယ်ဗျာ ။

စာ အဆုံးထိ ဖတ်ဖြစ်လို့
ကျွန်တော့်ရဲ့ ရည်ရွယ်ချက် နံပါတ် ၃ နဲ့ ပတ်သက်ပြီး
စိတ်ဝင်စား / တစ်ခုခု တွဲလုပ်ချင်ရင်
ကျွန်တော့်ကို Message ပို့ထားနိုင်ပါတယ်ဗျာ ။

📌
ဒီစာကို ( ခုချိန် မှာ ) ရေးသင့်မရေးသင့်
တော်တော်ကြီးကို စဉ်းစားဖြစ်ခဲ့ပါတယ် ။
တခြား စာတွေ ဆို
လိုအပ်သလောက် အမုန်းခံ / အဆဲခံ /
အရွဲ့ခံ ရေးလေ့ရှိပြီးတော့
ဒီ စာ ကျမှ ဘာလို့ ဒီလောက် တွန့်နေရသလဲဆို
ဒီ စာကြောင့်
” ကျွန်တော့်ကို ဒီဘဲ ဘာ ထဖြစ်နေတာလဲ ” ဆိုပြီး
ကြည့်မရဖြစ်နေသူ တစ်ချို့တွေ
ကျွန်တော့် အပေါ်
နားလည် လက်ခံသွားကောင်းသွားနိုင်ပေမယ့်
ကျွန်တော် တကယ် လိုချင်တဲ့ ပန်းတိုင်နဲ့တော့
နည်းနည်း ပို လှမ်းသွားနိုင်လို့ပါ ။

📌
ခုတလောမှာ
ကျွန်တော့် အနေနဲ့
နိုင်ငံရေး / တော်လှန်ရေး အကြောင်းတွေတင် မဟုတ်ပဲ
အကဲ ဆတ်နိုင်တဲ့ ဘာသာရေး အကြောင်း တစ်ချို့
တမင် ရေးတင် ဖြစ်နေတာ
ရည်ရွယ်ချက် ၃ ခု ရှိပါတယ် ။

ပထမ ရည်ရွယ်ချက်ကတော့
ကိုယ်ရေးကိုယ်တာ ဆန်ဆန်ပါပဲ ။
အချိန် အားလေး နည်းနည်း ရှိတဲ့အခါမှာ
ဦးနှောက် လေ့ကျင့်ခန်း လုပ်ချင်လို့ /
( အမြင် မတူရင်တောင် ) ချဉ်းကပ်ပုံ /
ဆွေးနွေး ဟန် တူတဲ့ မိတ်ဆွေ သစ် တစ်ချို့ ရချင်လို့
ရေးဖြစ်တာပါ ။

လူတွေ ကြားမှာ ပဲ ရှိနေပေမယ့်
ဒီကာလမှာ နည်းနည်းတော့ အထီးကျန်တာကိုးဗျာ ။
အရင်လို အခြေအနေမှာတောင်
ကိုယ်နဲ့ လေ့လာအား သိပ်မကွာ /
အမြင် မတူရင်တောင်
အပြန်အလှန်စကားပြောလို့ ကောင်းတဲ့
မိတ်ဆွေက နည်းရတဲ့ အထဲ …
ခုက ကိုယ်တိုင်လည်း
( ၅၀၅ က ) ကြီး တွဲလျက်နဲ့အပြင်
ကိုယ့် မိတ်ဆွေတွေကလည်း
တော်လှန်ရေးထဲ သူ့နေရာနဲ့ သူ
တကွဲတပြား အလုပ် လုပ်နေကြတာများတော့
စကား အားရပါးရ ပြောရတာ နည်းသွားတယ်ပေါ့ဗျာ ။
ဒါကြောင့် အပြင်မှာ
အလုပ် တစ်ခုခု ရှိမနေတဲ့ ရက် /
အကြိတ်အနယ် စကားပြောရတာ မရှိတဲ့ ရက်တွေဆို
ခုလို စာတွေ ရေးနေတာ ကောင်းမယ် ဆိုပြီး
ရေးဖြစ်တာပါ ။

ရုပ်ရှင်ကြည့် / ဂိမ်းဆော့ / ဂစ်တာတီး ပဲ
လုပ်နေလည်း ရပေမယ့်
ဒါတွေပဲ လုပ်နေရင် … ကြာတော့
ကိုယ့်ကိုယ်ကို ကျက်သရေ တုံးလာသလို ခံစားရတယ်ဗျ ။
ဒါကြောင့် တစ်ချို့ စာတွေ ကို
လေ့ကျင့်ခန်း လုပ်သလို သဘောထားပြီး
တမင် ရေးဖြစ်နေတာပါပဲ ။

📌
ရည်ရွယ်ချက် ( ၂ ) ကတော့
ကျွန်တော် မနေ့က ပြောခဲ့ပြီးပါပြီ ။
သာမန်ထက် ပိုတွေး တဲ့ / အတွေးရဲတဲ့
လူ့ အဖွဲ့ အစည်း တစ်ခု ဖြစ်လာဖို့ /
အင်အား ပိုကောင်းလာဖို့
ဖြည်းဖြည်းချင်း လူ လိုက်စုနေတဲ့ သဘောပါ ။
စာအုပ်တွေ ထဲ မှာ ပါသလောက် …
ကိုယ် ယုံကြည်ချစ်ခင်သူ တွေ ပြောသလောက်ကိုသာ
အမှန်လို့ တထစ်ချ လက်ခံ ယုံကြည် နေတာမျိုး မဟုတ်ပဲ
ကိုယ့်ရဲ့ သိမှု / လက်ခံထားမှုကို
ကောင်းကောင်း စိန်ခေါ်နိုင်တဲ့ စာတွေ တမင်လိုက်ဖတ် /
အဲ့လို လူတွေနဲ့ စကားလိုက်ပြောရင်း
အမြဲ လေ့လာ သင်ယူ တွေးခေါ် အသုံးချနေတဲ့
လူ့ အဖွဲ့ အစည်းတစ်ခု ဖြစ်လာဖို့ အတွက်
ကျွန်တော့် တကိုယ်စာ နိုင်သလောက်
လုပ်ကြည့်နေတာပါ ။

အဲ့လို လူတွေကို
TTC ( ယခု – Thinkers ) Group တို့
Myanmar Geek Community Group တို့ မှာ
တစုတဝေးတည်း တွေ့ရလေ့ရှိပေမယ့်
အဲ့ Groups တွေကို မသိသေးသူတွေ …
အဲ့ Groups တွေမှာ ရေးနေပြောနေသလောက်
ပြင်းထန် လေးနက်မှုကို
အဆင်သင့် မဖြစ်သေးသူတွေအတွက်
ကျွန်တော်က တဖြည်းဖြည်းချင်းလေး
ဆွဲရေးပြီး အရှိန်တစ်ခု ပေးပေးနေတဲ့ သဘောပါပဲ ။

အဲ့ဒီ Groups တွေမှာက
သာမန်လူ တစ်ယောက်ရဲ့ အခြေခံ သိမှုကို
ကောင်းကောင်း ကိုင်လှုပ်လိုက်နိုင်တဲ့ စာမျိုးတွေ ကို
လေ့လာအား ကောင်းကောင်း /
အထောက်အထား အကိုးအကားခိုင်မာစွာနဲ့
အချိန် သေချာပေးပြီး
ရေးနေသူတွေ အများကြီးရှိပါတယ် ။
ဒါပေမယ့် …
သာမန် စာဖတ်သူတွေ ကြားမှာတော့
သိပ် လူသိမများသေးတဲ့ စာရေးကောင်းလွန်းသူတွေ
အများကြီး ဖြစ်နေပါတာမို့
( ကျွန်တော့် အမြင်တော့ )
နှမျော စရာ အတော်ကောင်းပါတယ် ။
Punk Rock လောက်တောင် နားမယဉ်သေးသူကို
Hardcore Metal တွေ ဖွင့်ပြမိသလို ဖြစ်နေတဲ့ သဘော
ဖြစ်နေတာပေါ့ဗျာ ။

ဒါကြောင့် …
ကျွန်တော့်လို ဟိုမရောက် ဒီမရောက် လူက
ကြားကနေ ပေါင်းကူး လုပ်ပေးနေရင်
ပို အဆင်ပြေမလား လို့
ကိုယ့်ဘာသာ ခံယူပြီး လုပ်ပေးနေမိတာပါ ။
( ဘယ် အဒ်မင်မှ မုန့်လာမကျွေးဖူးသေးပါဘူး 😅 )

📌 ရည်ရွယ်ချက် – ၃ 📌
ဒီ စာရေးဖို့ တွန့်နေရတဲ့
အဓိက ရည်ရွယ်ချက် ရောက်ပါပြီ ။
( တစ်ချို့လူတွေ ) အသက်အောင့်ပြီးသာ ဖတ်ပါလေ …

တော်လှန်ရေးက
ခုလို ဆက်တောင့်ခံထားနိုင်ရင် /
ခုလို ဆက်ကူနေကြနိုင်ရင်
အောင်တော့မှာပါ …
တစ်နိုင်ငံလုံး ကို အာဏာရှင် လက်အောက်က
ဆွဲထုတ်နိုင်မနိုင် ( ကျွန်တော့် အနေနဲ့ )
မသေချာသေးပေမယ့် …
လွတ်မြောက်နယ်မြေတွေ များများလာရင်း
နှစ်ခြမ်း ခွဲလိုက်နိုင်တာမျိုးကတော့
သေချာပေါက် ဖြစ်ကို ဖြစ်တော့မှာပါ ။
စကတည်းက ကျွန်တော်တို့ ထည့်တွက်ထားတဲ့
တောင် မြန်မာ – မြောက် မြန်မာ အနေအထားပေါ့ဗျာ ။

အဲ့ဒီကနေမှ အရှိန်ရရင် ရသလို
တစ်နိုင်ငံလုံး ပြန်ရလိုက်ဖို့လည်း များပါတယ် ။
EAOs တွေ , NUG နဲ့ Local PDF တွေ နဲ့
ပြည်တွင်း ပြည်ပ အထောက်အပံ့တွေ
ဟန်ချက် ညီရင် ညီသလို
ပိုကောင်းတဲ့ ရလာဒ်တွေ ထွက်လာမှာပါပဲ ။

ဒါပေမယ့် …
တော်လှန်ရေး ပြီးတဲ့ အခါ
( ကံဆိုးရင် တော်လှန်ရေး ပြီးလု ပြီးခင် ကာလမှာတင် )
ကျွန်တော်တို့ ရင်ဆိုင်ရမယ့် ပြဿနာကြီး တစ်ခု
ရှိနေပါတယ် ။
အဲ့အတွက် ကျွန်တော်တို့ ပြည်သူ အများစု
အဆင်သင့် ဖြစ်ကြပါရဲ့လား ?

📌
ဖက်ဒရယ် ကိစ္စပါ ။
ကျွန်တော်က နိုင်ငံရေးသမား မဟုတ်တဲ့ အတွက်
နိုင်ငံရေး ရှုထောင့်က မဟုတ်ပဲ
လူမှုရေး ရှုထောင့်ကနေပဲ သတိပေးမှာပါ ။

ကျွန်တော်တို့ …

ဗမာ လူမျိုး
ထေရ ဝါဒ ဗုဒ္ဓဘာသာဝင် ဆိုသူတွေဟာ
ဖက်ဒရယ် အတွက် တကယ် အဆင်သင့် ဖြစ်ပါရဲ့လား ?

စာကို လိုတာထက် ပိုမရှည်အောင်
အဆင်သင့် ဖြစ်ပါ့မလား ? လို့
ကျွန်တော် သံသယ ဝင်ရတဲ့ အချက် ၂ ချက်ပဲ
ကျွန်တော် ဒီစာမှာ ရေးပါ့မယ် ။

📌
ပထမ အချက်က အရင်းအမြစ် ခွဲဝေ သုံးစွဲမှု ပိုင်းပါ ။
ကျွန်တော်တို့ ဗမာ အများစုဟာ
ကိုယ့် တစ်ယောက်စာ အနေနဲ့တော့
” ငါတို့ ဘာမှလည်း ပို မယူထား / ပို ရမနေပါဘူး ကွာ ” လို့
ပြောလေ့ ရှိကြပေမယ့်
တစ်နိုင်ငံလုံး အတိုင်းအတာနဲ့ ကြည့်ဖို့
မျက်စိ လျှမ်း နေတတ်ကြပါတယ် ။

ဒါကတော့ …
လက်ရှိ ပြည်နယ် နှင့် တိုင်း ခွဲထားပုံအရကို
တိုင်းရင်းသားတွေ အတွက် မမျှတဘူး ဖြစ်နေတယ် ဆိုတဲ့
အချက်ပါ ။
( ဗမာ ဆိုတာလည်း တိုင်းရင်းသားထဲက တိုင်းရင်းသားပဲ ဆိုတာ ကျွန်တော် အပြည့်အဝ လက်ခံပေမယ့်
အခေါ် အပြော လွယ်အောင် ခုလိုပဲ သုံးလိုက်ရတာ
ခွင့်ပြုပါ ။
တိုင်းရင်းသား လို့ သုံးလိုက်တိုင်း
ဗမာ မဟုတ်သော တိုင်းရင်းသားတွေ အတွက်လို့
မှတ်ယူပေးပါ ။ )

စဉ်းစားကြည့်ပါ ။
( ကိုယ်ပိုင် အုပ်ချုပ်ခွင့် ရပြီးတဲ့ ဒေသတွေ
ခဏ ထား တွက်ရင် )
ပြည်နယ် နှင့် တိုင်း ၁၄ ခု ရှိတယ်ပဲ ဆိုပါစို့ ။
ကချင် / ကယား / ကရင် / ချင်း /
မွန် / ရခိုင် / ရှမ်း စတဲ့ …
၇ ပြည်နယ် ဟာ တိုင်းရင်းသား အများစု
နေထိုင်ရာ ပြည်နယ်တွေ ဖြစ်ပြီးတော့ …
ရန်ကုန် / ပဲခူး/
မန္တလေး / စစ်ကိုင်း / မကွေး /
ဧရာဝတီ / တနင်္သာရီ စတဲ့
တိုင်း ၇ တိုင်း ဟာတော့
ဗမာ လူမျိုး အများစု
( အများစု မဟုတ်ရင်တောင် အတော်များများ )
နေထိုင်နေကြတာပါ ။
နေပြည်တော်က ပေါ်တာ မကြာသေးတော့
ခဏ ဖယ်ထားလိုက်မယ် ။ )

ဒီတော့ …
အစိုးရ တစ်ရပ် အနေနဲ့
အရင်းအမြစ်
( ငွေ / အဆောက်အဦး / ပညာရှင် .. စသည် ) ချပေးဖို့
ဆွေးနွေး စီစဉ် ကြရာမှာ
တိုင်း / ပြည်နယ် တစ်ခု စီ အတွက်
< နားလည်လွယ်အာင် အကြမ်းဖျဉ်းပဲ ပြောတာပါ >
ညီညီ မျှမျှ ချပေးလိုက်ရင်တောင်
ဗမာ ၇ စု – တိုင်းရင်းသား ၁ စု ဖြစ်နေပါတယ် ။
( ဖြစ်နေခဲ့တာ ကြာပါပြီ )

အတွင်းက ကိန်းဂဏာန်းတွေ လိုက်မရှာချင်တော့လို့
အကြမ်းဖျဉ်း ခြုံပြောရတာခွင့်လွှတ်ပါ ။
အမြင်သာဆုံး ပြောရာင်
ဝန်ကြီး ခန့်အပ်တဲ့ နေရာမှာတင်
အချိုးအစား အတော် စ ကွာ နေပြီပေါ့ဗျာ ။

ဒီ ကိစ္စဟာ …
ရနေတဲ့ / ယူနေမိတဲ့
ကျွန်တော်တို့ ဗမာ လူမျိုးတွေအတွက်
မသိသာပေမယ့် …
တခြား တိုင်းရင်းသားတွေအတွက်တော့
အတော် စိတ် ကသိကအောင့် နိုင်စရာ ကိစ္စကြီး ဖြစ်နေတာ
နှစ်ပေါင်းများစွာ ကြာပါပြီ ။

နိုင်ငံရေး သမား တစ်ချို့က
ဒီ ကိစ္စကို နိုင်ငံရေး နည်းလမ်းအရ ပြေလည်အောင်
တိုင်း ၇ တိုင်းကို ပေါင်းပြီး
ဗမာ ပြည်နယ် ၁ ခု ( ဒါမှမဟုတ် )
၂ ခု အနေနဲ့ သာ သတ်မှတ်ဖို့ လုပ်ခဲ့ပေမယ့်
အကြောင်းကြောင်း ကြောင့် အသက် မဝင်ခဲ့ပါဘူး ။

အခု … ဖက်ဒရယ် ကိစ္စမှာ
တိုင်းရင်းသား တော်လှန်ရေး / နိုင်ငံရေးအဖွဲ့တွေနဲ့
ဆွေးနွေး ညှိုနိုင်းရာမှာ
ဒီ ကိစ္စဟာ ပြန်ကို ပါလာမှာပါ ။
ပြည်သူကို အချိန်တန်ရင် အသိပေးကို ပေးရမှာပါ ။
အဲ့အချိန်မှာ ဗမာ လူမျိူး ဆိုသူတွေ ရှော့ခ်မရဖို့ /
< အောင့် သက်သက်နဲ့ မဟုတ်ပဲ >
ကျေကျေနပ်နပ် လက်ခံပေး – အားပေးပေးကြဖို့
အရေးကြီးပါတယ် ။

နိုင်ငံရေး သမားတွေဟာ
( လက်နက်ကိုင် တော်လှန်ရေးသမားတွေရဲ့
သဘောထား နဲ့ တင်မက )
ပြည်သူ အများစုရဲ့ ဆန္ဒအတိုင်း လုပ်ရမှာမို့
ဒီ အတွက် ပြည်သူ အများစု ကိုယ်တိုင်က
အဆင်သင့် ဖြစ်ဖို့ လိုပါတယ် ။
အထူးသဖြင့် …
အရင်ကထက် စာရင်
လျှော့ ရ သွားနိုင်တဲ့ ဗမာ လူမျိုးတွေက
အဆင်သင့် ဖြစ်ဖို့ လိုပါတယ် ။

📌
ဒါတော့ ဟုတ်ပြီ ကိုဇင်ဇေ ရေ …
ဒီ ကိစ္စနဲ့ ခင်ဗျား ဘာသာ ဘာသာရေး အကြောင်း
လျှောက်ရေးနေတာနဲ့
ဘာဆိုင်လို့ ထည့်ပြောနေရတာလဲ ဆိုရင် …
( ကျွန်တော် မှန်းတာ မမှားဘူး ဆိုရင် )
ဘာသာရေး နဲ့ ပတ်သက်တာတွေမှာလည်း
ကျွန်တော်တို့ တန်းတူ ညီမျှ ဖြစ်ရတော့မယ် အချိန်
ရောက်ပြီ မို့ပါ ။

ကျွန်တော်တို့ မြန်မာနိုင်ငံဟာ
ဗုဒ္ဓဘာသာ ကိုးကွယ်သူ အများစု ရှိတယ်လို့
အကြမ်းဖျဉ်း သတ်မှတ်နိုင်ပေမယ့်
ဗုဒ္ဓ ဘာသာ နိုင်ငံတော် မဟုတ်ပါဘူး ။
( ဗိုလ်ချုပ် ပြောခဲ့တဲ့ စကား ကြားဖူးမှာပါ )

ဒါပေမယ့် …
တစ်ချက် သေချာ ပြန်ကြည့်လိုက်ပါ ။
နှစ်ပေါင်းများစွာမှာ
နိုင်ငံတော် အကြီးအကဲပေါင်းများစွာက
ဘယ် ဘာသာကို ကိုးကွယ်လဲ ?
ဘယ် ဘာသာရဲ့ အရေး ကိစ္စ အပေါ်မှာ
နိုင်ငံရဲ့ ငွေကြေး နဲ့ လူ့ အရင်း အမြစ်တွေကို
အများဆုံး သုံးနေခဲ့သလဲ ?
နောက်ဆုံးဗျာ …
နိုင်ငံပိုင် သတင်းစာမှာတောင်
ဘယ် ဘာသာရဲ့ အဆုံးအမတွေကိုပဲ
ဦးစားပေး ထည့်ပေးနေခဲ့သလဲ ?

ဒါတွေဟာ …
ပြုလုပ်နေသူတွေ ဘက်က လူတွေ အတွက်
ဘာမှ အရေးမကြီးဘူးထင်ရပေမယ့်
ခံနေရတဲ့ သူတွေ ဘက်ကနေ ကိုယ်ချင်းစာကြည့်ရင်
အောင့်သီး အောင့်သက် အတော် ဖြစ်စရာပါ ။

နှစ် ကြာလာတဲ့ အခါ
အောင့်သီး အောင့်သက် ဖြစ်ရာ အဆင့်ကနေ
ရင်ထဲ နင့်နေရတဲ့ နာစရာတွေ ဖြစ်လာပါတယ် ။
ကြာလာလို့
( ထုတ်ပြောလည်း မထူးပါဘူးကွာ ဆိုတဲ့
စိတ်တွေ ဝင်သွားလို့ …
ငါတို့ အသိုင်းအဝိုင်းထဲမှာ ပဲ
ငါတို့ တတ်နိုင်သလောက်
ဝိုင်း စောင့်ရှောက် အားပေးကြတာပေါ့ ဆိုတဲ့
စိတ်တွေ နဲ့ )
သိပ် ထုတ်မပြောကြတော့ပေမယ့်
သူတို့ ( ထေရ ဝါဒ ဗုဒ္ဓဘာသာဝင် မဟုတ်သူတွေ ) ရဲ့
ရင်ထဲမှာ ဒါတွေ ရှိနေမှာ သေချာပါတယ် ။

ဒီကာလမှာ
ကျွန်တော် ဘယ်ရောက်ပြီး
ဘယ်သူတွေ နဲ့
ဘာတွေ လုပ်နေတယ် … ဆိုတာ
အများသိအောင် ပြောလေ့ မရှိပေမယ့်
အရင်ကထက် စာရင်
ဒါတွေကို
ကျွန်တော် တကယ် သိလာတဲ့ အနေအထားတစ်ခုကို
ရောက်နေတယ် လို့ပဲ ပြောပါရစေ ။

တော်လှန်ရေးကြီး အောင်မြင်လို့
တကယ့် ဖက်ဒရယ် ပြည်ထောင်စုကြီးကို
တည်ဆောက်တဲ့ အခါ
( နိုင်ငံ တစ်နိုင်ငံလုံးမှာ ရှိတဲ့
တိုင်းရင်းသား ပေါင်းစုံ / ဘာသာပေါင်းစုံ
ကောင်းကျိုးအတွက် ရည်ရွယ်ပြီး
လုပ်ရမှာ ဖြစ်တဲ့ အတွက် )
ထေရ ဝါဒ ဗုဒ္ဓဘာသာ အပေါ်
( အရင်ထက် ) ဦးစားပေးမှု လျော့ကြသွားပြီး
ကျန်တဲ့ ဘာသာ တရားတွေကိုပါ
အရင်းအမြစ် / အခွင့်အရေးတွေ
မျှတစွာ ခွဲဝေ ပေးမယ်ဆိုရင် …

ထေရ ဝါဒ ဗုဒ္ဓ ဘာသာဝင် ဆိုသူတွေ
အဆင်သင့် ဖြစ်ပါရဲ့လား ?
( ကျွန်တော်ကတော့ ဖြစ်ပါတယ် ။
အဲ့လို ပဲ ဖြစ်စေချင်နေတာပါ ။
မဖြစ်ရင်လည်း ဖြစ်အောင်
ကျွန်တော် နိုင်သလောက် တွန်းမှာပါ ။ )

ဗုဒ္ဓဘာသာ ရဲ့ ပွဲတော်ကြီးတွေကိုတင်
နိုင်ငံ့ အကြီးအကဲတွေက အားပေး /
ငွေ နဲ့ လူအား အမြောက်အများ
စိုက်ထုတ်ပေးတာ မဟုတ်တော့ပဲ
တခြား ဘာသာတွေရဲ့ ပွဲတော်တွေကိုလည်း
တန်းတူ အားပေး – လူအားငွေအား စိုက်ထုတ် –
ကျင်းပ ပေးရပါမယ် ။

ကျောင်း သင်ခန်းစာတွေမှာ
ဆရာ / ဆရာမတွေဟာ
ရတနာ ၃ ပါး လောက်ကိုပဲ
တစ်ချိန်လုံး ညွှန်းမနေပဲ …
တခြား ဘာသာရေး ခေါင်းဆောင်တွေ အကြောင်းနဲ့
သူတို့ ဘာသာတရားတွေရဲ့ အနှစ်သာရတွေကိုလည်း
ကျောင်းသူ / ကျောင်းသားတွေ ဆုပ်ကိုင်မိအောင်
သင်ပေးရပါတော့မယ် ။
( အဲ့ အခါကျ
ငါ့ကလေးကို ဒါတွေ သင်ပေးရမလား ? ဆိုပြီး
ပြဿနာ သွားရှာချင်တဲ့ မိဘတွေ
ဘယ်နှယောက်လောက် ရှိမယ် ထင်လဲ ?

သတင်းစာမှာလည်း
ထေရ ဝါဒ ဗုဒ္ဓ ဘာသာဘက်က
ဘုရားစာတွေ ချည်း ထည့်နေရာက နေ
တခြား ဘာသာတရားတွေရဲ့ အဆုံးအမတွေကိုပါ
အလှည့် ကျ ထည့်ပေးရပါတော့မယ် ။
TV Channel တွေမှာလည်း
ဘာသာရေး အစီအစဉ်တွေကို
တန်းတူ အချိန်ပေး ရပါတော့မယ် ။

ကဲ … ကျွန်တော် မေးပါမယ် ။
ထေရ ဝါဒ ဗုဒ္ဓဘာသာ ဝင် ဆိုသူတွေ
ဘာသာရေး ခေါင်းဆောင်တွေ အတော်များများ
ဒီ အတွက် အဆင်သင့် ဖြစ်ပါရဲ့လား ?
တွေးထား – ပြင်ဆင်ထားပြီး ဖြစ်ပါရဲ့လား ?

ဟာ … ကိုဇင်ဇေ ရာ
ဒါတွေ ဖြစ်မလာနိုင်ပါဘူး ။
ခင်ဗျား သောက်ပိုတွေ လျှောက်ချဲ့တွေးနေတာပါ လို့
ပြောချင်သူတွေလည်း ရှိလိမ့်မယ် ။
တူညီစွာ သဘောထား ကွဲလွဲ ရုံပါပဲ ။
ကျွန်တော်ကတော့ ဒါတွေ ဖြစ်လာမယ် …
ဖြစ်လည်း ဖြစ်လာသင့်တယ် … လို့
ယုံကြည်ပါတယ် ။

ဖြစ်မလာ တာ သေချာ သွားရင် လည်း
ကျွန်တော် ရှက်လွန်းလို့
ဒီ နိုင်ငံမှာ မနေတော့ဘူး ။
တိုင်းရင်းသားတွေ ပေါ်မှာ
ကျွန်တော်တို့ အကြွေး ထပ်တင် သွားမှာ မို့ပဲ ။
( တိုင်းရင်းသားတွေ ထဲမှာလည်း
ဗုဒ္ဓဘာသာ ကိုးကွယ်သူ အမြောက်အများရှိပေမယ့်
ထေရ ဝါဒ ဟုတ်မဟုတ် နဲ့
တခြား ဘာသာ ကိုးကွယ်သူ
% ဘယ်လောက်ရှိမလဲ ?
ဆိုတာ အကြမ်းဖျဉ်း တော့ မှန်းနိုင်ကြမယ် ထင်ပါတယ် )

နိုင်ငံရေး သမားတွေ အနေနဲ့
ဘာသာတရား အားလုံး မဟုတ်ရင်တောင်
ဘာသာကြီး ၄ ရပ်ကို မျှမျှတတ အားပေးဖို့ လိုသလို
ကျွန်တော်တို့ ပြည်သူတွေကလည်း
အဲ့လို မျှမျှတတ အားပေးတာကို
ရင်ထဲကနေ ကျေကျေနပ်နပ် လက်ခံနိုင်ဖို့ လိုပါလိမ့်မယ် ။

ခု တလော
ကျွန်တော် ဘာသာရေးနဲ့ ပက်သက်လို့
အကဲ ဆတ်တာတွေ ရေးပြီး တွန်းကြည့်နေတာ
အဲ့ဒီ အတွက်ပဲ ။
မြန်မာနိုင်ငံမှာ
လူဦးရေ အများဆုံး လို့ အကြမ်းဖျဉ်းယူဆလို့ရတဲ့
ထေရ ဝါဒ ဗုဒ္ဓဘာသာ ဝင်တွေ
ဘယ်လောက် ထိ သဘောထားကြီးနိုင် မလဲ ? ဆိုတာ
ကျွန်တော် ကိုယ်တိုင်
ထိုက်သင့်သလောက် အနာခံ တောက်ကြည့်နေတာပဲ ။
( ဘယ်သူမှ ခိုင်းလို့ မဟုတ်ဘူးနော် ။
ကျွန်တော်က ခိုင်းတိုင်း လုပ်မယ့် လူလည်း မဟုတ်ဘူး ။
ဘယ်သူ/ဘယ် အဖွဲ့အစည်းဆီကမှ
ငွေယူပြီး လုပ်ပေးနေတာလည်း မဟုတ်ဘူး ။
ကျွန်တော့် ခံယူချက် ရယ်
ဖြစ်နေတာတွေပေါ် မူတည်ပြီး
ဖြစ်လာနိုင်တာတွေအပေါ် ခန့်မှန်းချက်အရ ရယ်
ကြိုတွေးပြီး
လုပ်နိုင်သလောက် လုပ်ကြည့်ပေးနေတာ ။ )

ဘယ် မေးခွန်း ? ဘယ် လောက် အဆင့် ထိ ? ကို
ဘယ် အဖွဲ့တွေက ? ဘယ်သူတွေနဲ့ပဲ
မေးမြန်း ဆွေးနွေး အဖြေရှာ သင့်တယ် …
ဆိုတာလောက်ကို
ကျွန်တော်က မသိလို့
လျှောက်မေးနေတာ လို့ ထင်ကြသူတွေလည်း ရှိမှာပါ ။
( ကျွန်တော် က ပေါင်းသင်း ဆက်ဆံရေး သိပ်မကောင်းလို့
သူငယ်ချင်း နည်းပေမယ့်
အလုပ် သဘောအရ / လူမှုရေး လုပ်ငန်းတွေ အရ
သိကျွမ်းတဲ့ မိတ်ဆွေတွေ တော့
ကျွန်တော့်မှာ မနည်းလှပါဘူး ။
သူတို့တွေရဲ့ ဆင့်ပွား ကူညီမှုတွေနဲ့သာဆိုရင်
ကျွန်တော် လိုချင်တဲ့ အဆက်အသွယ်ထဲက
၁၀၀% မဟုတ်ရင်တောင်
၅၀-၇၀% လောက်တော့ ရအောင်
ကျွန်တော် < ရှာချင်စိတ် တကယ်ရှိရင် >
ရှာနိုင်ပါတယ် ။ )

ဒါကို သိလျက်နဲ့
သာမန် လူ အများစုရဲ့ အမြင် နဲ့
သဘောထားကြီးမှုကို သိချင်လို့
တမင် Public Posts တွေ အနေနဲ့ ရေးနေခဲ့တာပါ ။

ခု ကျွန်တော် တောက်ကြည့်မိသလောက်တော့
ဘာသာတရား နဲ့ ပက်သက်လို့
အရင်း အမြစ် ခွဲပေးရတော့မယ် ဆိုရင်
အဆင်သင့် မဖြစ်ကြသေးတဲ့
ထေရ ဝါဒ ဗုဒ္ဓဘာသာဝင်တွေ များနေပါသေးတယ် ။

မျက်မြင် တွေ့ ရ / အသုံးချလို့ ရတဲ့
ငွေ – လူအား စတဲ့ အရင်း အမြစ် တွေ မပြောနဲ့ ။
လက်ဆုပ် လက်ကိုင် ပြမရတဲ့
အမှန်တရား လို့
သူတို့ ထင်ထားတဲ့ အရာတွေပေါ်မှာတောင်
နှစ်ဖက် မျှ မကြည့်ပေးနိုင်ပဲ
အစွဲ ကြီးလွန်းသူတွေ များနေတယ် ။

” ကျွန်တော်က နိဗ္ဗာန် မရောက်ချင်သေးလို့ပါ ” ဆိုရင်
သဘောထားကြီးသူတွေ အနေနဲ့
” ဟုတ် ကိုဇင်ဇေရေ …
အကို့ လက်ရှိ သဘောထားကို နားလည်ပါတယ် ။
ဒါပေမယ့် ကျွန်တော်တို့ ထေရဝါဒ ဗုဒ္ဓဘာသာမှာ
လူတိုင်းကို နိဗ္ဗာန်ကိုပဲ အတင်း ရည်ရွယ်ခိုင်းနေတာတော့
မဟုတ်ပါဘူး ။
အဲ့လို ပြောနေသူ တစ်ချို့လည်း ရှိတော့ ရှိပါတယ် ။
ဒါပေမယ့် တကယ်တမ်းမှာ
မြတ်စွာဘုရား အနေနဲ့
သံသရာ က လွတ်မြောက်ချင်သူတွေအတွက်သာမက
သံသရာမှာ ကျင်လည်နေချင်သေးသူတွေအတွက်
အကျိုး ရှိစေမယ့် အတွေးအခေါ် အယူအဆပေါင်းများစွာကိုလည်း ဆုံးမပေးခဲ့တာပါ အကိုရေ ။
အကို အချိန်ရလို့ စိတ်ဝင်စားရင် ဒါလေးတွေ
လေ့လာ ကြည့်စေချင်ပါတယ် … ” လို့
ပြောတဲ့သူဟာ ၁၀% တောင် မပြည့်ဘူးရယ် ။

၉၀% ကတော့
နိဗ္ဗာန်သာ လူဖြစ်ရခြင်းရဲ့ ပန်းတိုင် အစစ်ဖြစ်ကြောင်း …
ဒါကို မလိုချင်သေးတာဟာ
ကိုယ်တိုင်က ညံ့သေးလို့ /
အားထုတ်မှု မရှိသေးလို့ ဖြစ်ကြောင်း …
အားထုတ်လိုက်တာနဲ့
ဗုဒ္ဓဘာသာပဲ ဖြစ်သွားမှာ ဖြစ်ကြောင်း …
ဗုဒ္ဓ ဘာသာရဲ့ အနှစ်သာရကို နားမလည်လို့
နိဗ္ဗာန် ကို မလိုချင်သေးတာ ဖြစ်တဲ့အတွက်
ကိုယ့်ကိုယ်ကို ဗုဒ္ဓဘာသာလို့တောင်
မပြောသင့်ကြောင်း …. စတာတွေပဲ
ပြောနေကြတာ များတယ် ။

ဒီလိုပဲ …
ပါချုပ် ဆရာတော်ကြီးကို သွားမေးပါ ဆိုသူတွေကို
ပါချုပ် ဆရာတော်ကြီးရဲ့
ဒီရေ တက်ရခြင်း အကြောင်းကို
ကျမ်းဂန်လာ အတိုင်း ဆိုပြီး ဟောထားတာဟာ
သိပ္ပံ နည်းကျ အထောက်အထား ခိုင်မာမှုတွေနဲ့
ပြန်ချိန် လိုက်ရင် အတော် လွဲနေကြောင်း …
သူကသာ အဲ့ဒီ အမှားကို
ပွင့်လင်းစွာ ပြန်သုံးသပ်ဝန်ခံပေးရင်
ကျွန်တော့် အနေနဲ့
တခြားသော မေးခွန်းတွေကို
သွားရောက် မေးမြန်းဖို့လည်း စိတ်ဝင်စားကြောင်း
ခပ်ပါးပါး သတိပေးလိုက်ရင် …
” ဟုတ်တယ် ကိုဇင်ဇေရေ …
အဲ့ ကိစ္စ ကတော့ ဆရာတော်ကြီး ဟောတာ
ကျမ်းဂန်လာ အရ ပေမယ့်
လက်တွေ့ နဲ့ ယှဉ်ရင် မှားသွားတယ် လို့
ကျွန်တော်လည်း လက်ခံပါတယ် ။
အဲ့ ခေတ် အဲ့ အခါက ကျမ်းဂန်တွေကို
ပြုစုသူတွေ မှာလည်း
ဘုရား ဟောတာ မဟုတ်တဲ့ အကြောင်း ကိစ္စတွေကို
သူတို့ ဘာသာ ဖြည့်စွက်
ရေးထားတာတွေများ ရှိနိုင်မလား မသိဘူး ။
ဒါတွေကို သန့်စင်အောင်
ကျွန်တော်တို့ ပြန် ကြိုးစား ရပါဦးမယ် ” လို့
သေချာ ဝန်ခံသွားတဲ့သူ အတော်ရှားပြီး
အများစုက
စကားလမ်းကြောင်း လွှဲသွား /
မသိချင်ယောင် ဆောင်သွားကြတာပဲ များပါတယ် ။

( ကျွန်တော် ပေးတဲ့ ဥပမာ ၂ ခုပေါ်
တုံ့ပြန်မှုတွေ ကို မယုံရင်
ကျွန်တော့် Posts တွေရဲ့ Comments တွေမှာ
ပြန် လိုက်ကြည့်နိုင်ပါတယ် )

ကျွန်တော့်မှာ
အဲ့ဒီ ထဲကမှ ရရင် ရသလောက် စစ်ထုတ် /
ပြေပြစ်တဲ့ သူဆို ညှိယူပြီး
ကျွန်တော် လိုချင်တဲ့ မျှခြေကို
စိတ်ရှည် လက်ရှည် တည်ဆောက် ယူကြည့်ရတယ် ။
( အမှန်တော့
ကိုယ့် သောက်ပူ ကိုယ့် ရှာနေတာပဲ 😅 )

📌
ကျွန်တော့် ဘာသာရေး ဆိုင်ရာ Posts တွေကို
သေချာ ဖတ်တဲ့ သူတွေဆို သတိထားမိလိမ့်မယ် ။
ကျွန်တော် ဆွေးနွေးသွားတဲ့ ကိစ္စတွေမှာ
ကျွန်တော် ဘယ် ဘက်ကိုမှ
သိသိသာသာ မရပ်ပြသွားဘူး ။
မသိမသာ နဲ့
အဟ လေးတွေ တမင် ထားထား ခဲ့တယ် ။

ဘာလို့ ဆို
ကျွန်တော့် ရည်ရွယ်ချက်က
ရပ်တည် ဖို့ ဘက် ရှာနေတာ မဟုတ်သလို …
ကျွန်တော် ရပ်တည်တဲ့ ဘက် က မှန်တယ်လို့လည်း
စည်းရုံးချင်နေတာ မဟုတ်ဘူး ။
( ဒါကြောင့် ကျွန်တော် ဘာ ရပ်တည်တယ်ဆိုတာ ကို
အပြီးအပြတ် မပြောပဲ ချန်ချန်ပေးထားတာ ။
ဆက်ဖိ ပြောရင် – မေးရင် ရနိုင်ပေမယ့်
တစ်ချို့ဟာလေးတွေ ဟ ပေးထားလိုက်တာ ။ )

ဘာလို့ ဆို
ကျွန်တော့် ရည်ရွယ်ချက်က
ဘာသာ ပေါင်းစုံက လူတွေ
( အထူးသဖြင့်တော့
ကျွန်တော် ကြီးပြင်း ကျင်လည်ခဲ့ရတဲ့
ထေရ ဝါဒ ဗုဒ္ဓဘာသာဝင် ဆိုသူတွေပေါ့ ) ကို
အတွေး အခေါ် ပိုင်း ငြင်းခုံရာမှာ
အရေ ထူစေချင်တဲ့ အပြင် …
ကိုယ့် ဘက် သူ့ ဘက် ပြတ်ပြတ်သားသား အဖြေမရပဲ
မျှခြေ အဖြစ် လက်ခံလိုက်ရတဲ့
အနေအထားမျိုးတွေမှာလည်း
ကျေကျေနပ်နပ် ရင်ထဲက လက်ခံပေးတတ်တဲ့
သဘောထားကြီးမှု မျိုးကို ရစေချင်တာ ။

ရှင်းအောင် ပြန်ပြောရရင်
အပေါ်မှာ ပြောခဲ့သလို
တခြား ဘာသာတရားတွေ အတွက်ပါ
လူအား – ငွေအား တွေ မျှဝေ သုံးစွဲပေးဖို့
ခဏ ထားပါဦး ။
အမှန်တရား ဆိုတာကိုတောင်
မျှဝေ သုံးစွဲ ဖို့ သဘောထားကြီးကြီး
လက်ခံပေးနိုင်ရဲ့လား ? ဆိုတာကို
မေးခွန်းထုတ်ပြီး
မသိမသာ စည်းရုံးကြည့်နေတာပါပဲ ။

📌
ဒါတောင်
ကျွန်တော် ဘာသာမဲ့ သမားတွေ ဘက်က
ရေး မပြသေးဘူး ။
ဥပမာ – ဘာသာရေး အဖွဲ့အစည်းတွေ /
ခေါင်းဆောင်တွေ ဟာ
အခွန်ကင်းလွတ်ခွင့်ရနေကြတယ် ။
သူတို့ထဲက တစ်ချို့ဟာ သူတို့ ရဲ့
အဲ့ဒီ အခွန်ကင်းလွတ်ငွေတွေထဲက တစ်ချို့ကို
သူတို့ ဘာသာတရား အတွက်တင်မက
သူတို့ ကိုယ်ရေး ကိုယ်တာ အတွက်တွေပါ
သုံးစွဲနေကြတယ် ။ တစ်ချို့ဆို ဇိမ်ခံနေကြတယ် ။
ဒါဟာ တရားမျှတ ရဲ့လား ?
ဘာသာမဲ့ သူတွေကလည်း
ဟန်ပြ ဘာသာတရား တစ်ခု ဖန်တီးပြီး
အဖွဲ့အစည်း / ခေါင်းဆောင်တွေ ရေးထားလိုက်ပြီး
အခွန် ရှောင်မယ် ဆိုရင် ရမလား ? ဆိုတာမျိုး
ပြဿနာတွေ ကျွန်တော် တမင် မဆွေးနွေးသေးဘူး ။
ပို ပွဲဆူ ကုန်မှာ စိုးလို့ပါ ။

📌
ကဲဗျာ …
စာလည်း အတော် ရှည်ပြီဆိုတော့
ဒီစာ ရေးဖြစ်တဲ့ အဓိက အကြောင်းရင်း ဖြစ်တဲ့
ရည်ရွယ်ချက် ၃ ဟာ

ဗမာ တွေနဲ့ တိုင်းရင်းသားတွေ
တကယ် တန်းတူ အခွင့်အရေး ရဖို့
တိုင်း ၇ တိုင်းကို ပြန်ပေါင်းပြီး
ဗမာ ပြည်နယ် ဆိုတာမျိုး ပြန်စုလိုက်ရင်တောင်
ရှော့ခ် မရပဲ
ကျေကျေနပ်နပ် လက်ခံပေးကြဖို့
ဘာသာတရား တစ်ခုကပဲ
အဓိက လွှမ်းမိုး အားကောင်းနေတဲ့
နိုင်ငံ အနေနဲ့ မဟုတ်တော့ပဲ
ဘာသာတရား တိုင်း တန်းတူ အခွင့်အရေးရပြီး
( ဖြစ်နိုင်ရင် ဘာသာမဲ့ တွေပါ တန်းတူ အခွင့်အရေးရပြီး )
တကယ် စစ်မှန်တဲ့ ဖက်ဒရယ် ပြည်ထောင်စု စနစ် ဖြစ်စေဖို့
တတ်နိုင်သလောက် သဘောထားကြီးကြဖို့ /
သဘောထားကြီးရကောင်းမှန်း သိကြဖို့ /
သဘောထား ကြီးတတ်ဖို့ ပါပဲ ။

အရင်က ဒါကို ဘာလို့
ပွင့်ပွင့်လင်းလင်း မရေးခဲ့သလိုဆိုရင်
ကျွန်တော်က တစ်နည်းအားဖြင့်
အလယ်အလတ် သဘောထား ရှိသူတွေနဲ့
သာမန် ရှေးရိုးစွဲ သူတွေကို
တဖြည်းဖြည်း ပါလာအောင် စည်းရုံးနေတာ ။
( အတွေးအခေါ် လွတ်မြောက်ပြီးသား လူတွေက
ကျွန်တော် စည်းရုံးနေစရာ မလိုဘူး ။
ဒါမျိုး ဖြစ်လာရင် သူတို့က အဆင်သင့် ဖြစ်ပြီးသား ။
ပျော်တောင် ပျော်ကြဦးမယ် ။ )

အလယ်အလတ် သဘောထားရှိသူတွေက
ကျွန်တော် ရေးနေတာတွေကို လက်ခံနိုင်ပေမယ့်
သာမန် ရှေးရိုးစွဲ သူတွေထဲမှာမှ
အစွန်းရောက်သူတွေဆို
ကျွန်တော် ရေးတာကို လက်မခံနိုင်ကြ /
ရွဲ့စောင်း ဆဲဆို ကြ
( ဆဲဖို့ လူတောင် တကူးတက လိုက်စုကြ )
ဖြစ်နေကြတာ မြင်မိမှာပါ ။

စည်းရုံးတယ် ဆိုတာကလည်း
စည်းရုံးနေမှန်း မသိလိုက်အောင်ကို စည်းရုံးလိုက်မှသာ
ကိုယ့်ဘက် ရောက်လာနိုင်ချေ ပိုများတာ ဆိုတော့
ကျွန်တော်က လည်း တမင် အဆဲခံပြီး
နည်းနည်းချင်း ရအောင် စည်းရုံးဆွဲခေါ်နေတာပဲ ။
( သိနေလျက်နဲ့ အယုံသွင်း စည်းရုံးခံကြတာ

မျက်လှည့် နဲ့
မင်းသား မင်းသမီး ကြော်ညာတွေပဲ ရှိတယ် 😅 )

စည်းရုံးတယ် ဆိုတာလည်း
ကျွန်တော့် အတွက် မဟုတ်ပါဘူးဗျာ ။
အပေါ်မှာ ရှင်းပြထားသလို
ပိုကောင်းတဲ့ လူ့ အဖွဲ့အစည်း ဖြစ်လာဖို့
( နိုင်ငံရေး ရှုထောင့် အရ ကြည့်ရင်
စစ်မှန်တဲ့ ဖက်ဒရယ် ပြည်ထောင်စု ဖြစ်လာဖို့ ) ပါပဲ ။

အခု ဒါကို အများသိအောင်
ပေါ်တင် ပြောလိုက်ခြင်းဖြင့်
ကျွန်တော့် စာတွေ ဖတ်တိုင်း
” ငါတို့တော့ စည်းရုံးခံနေရပါလား ? ” ဆိုတာ
သူတို့ ( ထေရဝါဒ ဗုဒ္ဓဘာသာ ဝင် ဗမာ လူမျိုးတွေ )
သိနေတဲ့ အတွက်
ကျွန်တော့် အနေနဲ့တော့
အရင်ထက် ကို ပိုပြီး စည်းရုံးရခက်သွားနိုင်တယ် ။

ဒါပေမယ့် …
တစ်ဖက်က ကြည့်ရင်
ကျွန်တော် ခု လုပ်နေတာမျိုးဟာ လုပ်သင့်တယ်လို့
ယူဆပြီး
ဝိုင်း ကူ ဝါဒ ဖြန့် စည်းရုံးပေးသူတွေလည်း
ပိုများ လာမယ် လို့ ကျွန်တော် မျှော်လင့်တယ် ။

📌
တစ်ခု ရှိတာက
ဒါများကွာ … အမေစု လွတ်လာလို့
တစ်ခွန်းတည်း ပြောလိုက်ရင်ကို
ပြည်သူတွေက ကျေကျေနပ်နပ် လက်ခံပြီးသားပါ ။
မင်းတို့လို ဗုံမဟုတ် ပတ်မဟုတ် ကောင်တွေ
လျှောက် လုပ်နေစရာ မလိုပါဘူး … လို့
ယူဆသူတွေလည်း ရှိပါလိမ့်မယ် ။

ဟုတ်ကဲ့ …
အဲ့လို ဆိုရင် လည်း … ကောင်းပါတယ် ။
ဒါပေမယ့် ကျွန်တော်တို့ လိုချင်တာက
လူတစ်ယောက် ပြောလိုက်လို့
( ပုဂ္ဂိုလ်ရေး ကိုးကွယ်မှု ပေါ် မူတည်ပြီး )
ကျန်တဲ့ သူတွေက
အလွယ်လေး လက်ခံပေးလိုက်ရတာမျိုး …
အားကောင်းလာမယ့် ဘက်က ပြောတာမို့
အားနည်းသူတွေဘက်က
အောင့်သီးအောင့်သက်နဲ့ လက်ခံပေးလိုက်ရတာမျိုး …
မဟုတ်ပဲ …

တကယ်ကို ရင်ထဲက သဘောပေါက် နားလည် လက်ခံပြီး
ရေရှည် ကျင့်သုံးတာမျိုးကို လိုချင်တာမို့
အတွေးအခေါ် အဆောက်အအုံ /
တွေးကျင့်တွေ ကနေ စပြင်ဖို့ ကြိုးစားနေတာပါ လို့ပဲ
ရှင်းပြပါရစေ ။

📌
အစကတော့ …
စာရေးဖော် ရေးဖတ်တွေ /
ဆွေးနွေးဖော် ဆွေးနွေးဖက်တွေကိုပဲ
ဒီ အကြောင်းကို ပြောပြ စည်းရုံးပြီး
စာတွေ ဝိုင်းရေးဖို့ … စဉ်းစား ခဲ့ပါသေးတယ် ။

ဒါပေမယ့် … ကျွန်တော် အပေါ်မှာ ပြောသလိုပဲ
အများစုက တော်လှန်ရေးထဲ တကွဲတပြားစီ
ရောက်နေကြတယ် …
ပြီးတော့ … အဲ့လို စုမိရင်တောင်
ကျွန်တော်နဲ့ အရင်က သိပြီးသူတွေပဲဆိုတော့
အင်အား နည်းမယ် ။
ဒါမှမဟုတ် …
တကယ် မလုပ်ပေးချင်ပေမယ့်
ကျွန်တော်က တကူးတက လာပြောလို့
အားနာပြီး လုပ်ပေးနေရတယ် … ဆိုလည်း
သူတို့ အတွက် မကောင်းဘူး ။
( စာဖတ်နာသူ / အတွေးနာသူ အများစုက
သူတို့ နဲ့ စာဖတ်သက်/ တွေးသက် ကွာသူတွေအပေါ်
စိတ်မရှည် နိုင်ကြတော့တာ များတယ်ဗျ )

ခုလို ပွင့်ပွင့် လင်းလင်း ရေးတင်လိုက်တဲ့အခါမှာတော့
အဲ့ဒါကို ဖတ်မိပြီးမှ
သူတို့ ဘာသာ စိတ်ပါလို့ လာ ပူးပေါင်းကြမယ်
( လက်ဆင့်ကမ်း ပြောပေးကြမယ် ) ဆိုရင်တော့
အင်အားလည်း ပိုများနိုင်သလို
ညှိယူစရာလည်း နည်းသွားနိုင်မယ် …
( တစ်ချို့ စာဖတ်/တွေးအား နာလွန်းတဲ့
ဘာသာမဲ့ သမားတွေကို
ဘာသာ ဝင်တွေ အပေါ်
လိုအပ်တာထက် ဖိမပြောဖို့ /
အတွေးအခေါ် ပွင့်လင်းသူချင်း ပြောနေကျထက်
သိသိသာသာ ကို စိတ်ရှည်ဖို့ က အစ
ညှိ ရ မှာမို့ပါ ။ )

တစ်ချို့ဆိုရင်
ကျွန်တော့် ကို ကြည့်မရလို့
တကူးတက လာမပူးပေါင်းပေမယ့် …
ဒီ ကိစ္စကိုတော့ လုပ်သင့်တယ် ထင်လို့
သူတို့ဘာသာ သီးသန့် လုပ်ကြမယ် … ဆိုတာမျိုးလည်း
ဖြစ်စေချင်လို့
ခုလို ရေးတင် လိုက်ရတာပါပဲ ။
( ထေရ ဝါဒ ဘုန်းဘုန်း တစ်ချို့တောင်
ပါရင် ပါလာနိုင်တယ် လို့
ကျွန်တော်ကတော့ မျှော်လင့်မိတာပါပဲ ။ )

📌
ကိုဇင်ဇေ ရာ …
ဖက်ဒရယ် ဖြစ်ဖို့က
အဝေးကြီး လိုသေးတာကို
ခုကတည်းက ဒါတွေ လုပ်နေဖို့ လိုလို့လား ? ဆိုရင်

တော်လှန်ရေး အတွေးအခေါ် မခိုင်မာသေးတဲ့
လူ တစ်ချို့ …
မခံချင်စိတ် သက်သက်နဲ့
တော်လှန်ရေး ဝင်လုပ်ရာက
မကြွယ်သင့်တာ ကြွယ်မိ / မကြွားသင့်တာ ကြွားမိလို့
သူတို့ ရော / တခြား ဆက်စပ်သူတွေပါ
ဖမ်းခံ – နှိပ်စက်ခံ – အသက်ပေးလိုက်ရတာမျိုးတွေကိုသာ
မြင်ယောင် ကြည့်စေချင်ပါတယ် ။

တကယ်လို့သာ
သူတို့ ဒီ့ထက် အချိန်ပိုရလို့
တော်လှန်ရေး အတွေးအခေါ် ခိုင်မာပြီးသား ဖြစ်နေခဲ့ရင်
ဒါမျိုးတွေ အများကြီး လျော့မသွားနိုင်ဘူးလား …
လို့ တွေးကြည့်ပေါ့ဗျာ ။

တကယ်ကတော့
ကျွန်တော်တို့ ကိုယ်တိုင်လည်း
ေ-က်သုံး မကျခဲ့တာပါ ။
လက်နက်ကိုင် တော်လှန်ရေး မလိုပဲ
အကြမ်းမဖက် အာဏာဖီဆန်ရေး သက်သက်နဲ့
စစ်အာဏာရှင်ကို ( ဖြုတ်မချနိုင်ရင်တောင် )
သူတို့ လုပ်ရပ်တွေကို ရပ်တန့် နိုင်မယ် … လို့
ယူဆမိခဲ့တာကိုး ။
အဲ့ အတွက် လက်နက်ကိုင် တော်လှန်ရေး ဘက်ကို
စ တည်ပေး – အတွေးအခေါ်
စသွင်းပေးနေသူတွေကိုတောင်
တန်ပြန် ချေပ စာတွေ ရေးခဲ့မိတာ
ကျွန်တော်တို့ မှားခဲ့ပါတယ် လို့ ဝန်ခံရမှာပါပဲ ။

ဒါကြောင့် …
ခု ကိစ္စမှာလည်း
တကယ် ဖြစ်လာတော့မှ
အတွေးအခေါ်ကို
နောက်ကနေ ပြန် လိုက်မိတ်ဆက်နေရတာထက်စာရင်
ခုကတည်းက နည်းနည်းချင်း
( လူများများ က ) ဝိုင်း မိတ်ဆက်ပေးထားနိုင်ရင်
အပြာင်းအလဲ ကာလမှာ
အများကြီး ပို အဆင်ပြေမယ် လို့ မျှော်လင့်မိပါတယ်ဗျာ ။
( နိုင်ငံရေး သမားတွေ လုပ်ရ သက်သာပြီး
တခြား ကိစ္စ ပို လုပ်နိုင်တာပေါ့ဗျာ )

ဒါပါပဲဗျာ …

ဘာသာတရား ပေါင်းစုံ က
ဘာသာဝင် တွေရော …
ဘာသာမဲ့ တွေ အတွက်ရော …
တိုင်းရင်းသား တစ်မျိုးချင်းစီတိုင်း အတွက်ရော …
မျှတ တဲ့ နိုင်ငံတော် သစ် တစ်ခုဆီ
အမြန် ရောက်နိုင်ပါစေ လို့ …

စေတနာဖြင့်

ကိုဇင်ဇေ

စာကြွင်း ။
အတွေး အရေး သမားတွေ
ရည်ရွယ်ချက် ၃ အတွက်
ကျွန်တော် နဲ့ အလုပ် တွဲလုပ်ချင်ရင်
Message ပို့ပြီး ဆက်သွယ်ထားနိုင်ပါတယ် ။
Facebook Groups / Pages တွေ
Telegram နဲ့ YouTube Channels တွေ
Websites နဲ့ Apps တွေ … စသဖြင့် စီစဉ်ပြီး
အတွေး အခေါ် အရွေ့ တစ်ခုကို တွန်းဖို့
ကျွန်တော် ကြိုးစားနေမှာမို့ပါ ။
( ကြားထဲမှာ မသေသွားရင်ပေါ့လေ 😅 )

ခုလောက် စာအရှည်ကြီးကို ပြီးအောင်
ဖတ်ခဲ့သူတွေ အနေနဲ့လည်း
ကျွန်တော့်ကို ထောက်ပြချင်တာပဲ ဖြစ်ဖြစ်
အားပေးချင်တာပဲ ဖြစ်ဖြစ်
တစ်ခုခု ရေးပေးခဲ့နိုင်ပါတယ် ။
ရေးပေးခဲ့စေချင်ပါတယ်ဗျာ ။

---

လိုင်းသုံးနေနိုင်သေးရင် ကလစ်လည်း လုပ်ပေးကြပါ …
ဘာတွေ ဘယ်လို ကလစ်ပေးနေလို့ ရမလဲ သိချင်ရင်
ဒီ လင့် ကို နှိပ်ပြီး လေ့လာနိုင်ပါတယ် ။

တကယ်လို့ တန်းပြီး ကလစ်ပေးချင်ရင်တော့
C2D ရဲ့ Eain Pyan Lann Website ကို ဒီလင့်ကို နှိပ်ပြီး အလွယ်တကူကလစ်ပေးနိုင်ပါတယ် ။

နွေဦးဖတ်စာရဲ့ တွဲဖက် Website တစ်ခု ဖြစ်တဲ့
LWSR – Learn With Spring Reader မှာလည်း
အင်္ဂလိပ်စာ လေ့လာ ထိတွေ့ရင်း ကလစ်ပေးလို့ ရပါတယ် ။

P2D ရဲ့ Nway Oo Videos မှာ ဘောလုံးပွဲတွေ ၊ Highlights တွေ ကြည့်ပြီးလည်း ကလစ်ပေးနိုင်ပါတယ်။

---